Marrëveshja ndërmjet Italisë dhe Shqipërisë për sigurimet shoqërore u nënshkrua në Romë më 6 shkurt 2024 dhe hyri në fuqi më 1 korrik 2025. Për shqiptarët që kanë punuar në të dy vendet, është ndryshimi më i rëndësishëm i viteve të fundit.
Çfarë ndryshon
Kush nuk i mbush kushtet për pension vetëm në njërin shtet, mund të bashkojë periudhat e sigurimit në Itali dhe në Shqipëri, me kusht që të mos mbivendosen. Çdo shtet paguan pjesën e vet të pensionit.
Ku aplikoni
- Nëse jetoni në Itali, shqiptar apo italian, aplikoni në INPS, te shërbimi online për pensionet ndërkombëtare. Zgjidhni Shqipërinë si shtet me marrëveshje dhe tregoni periudhat e sigurimit në Shqipëri. Mund të ndihmoheni edhe nga një patronato.
- Nëse jetoni në Shqipëri, aplikoni në ISSH, që ia dërgon kërkesën INPS-it.
Dokumentet shqiptare: këtu ngecin shumë
Për periudhat e punës në Shqipëri para vitit 2012, INPS kërkon të bashkëngjitet detyrimisht një deklaratë e historikut të punës, bashkë me dokumente mbështetëse si libreza e punës ose vërtetime. Duhet edhe kopja e dokumentit shqiptar të identitetit.
Pra, edhe nëse aplikimi bëhet në Itali, dokumentet duhen marrë në Shqipëri. Për periudhat pas 2012 vërtetimi merret shpejt në e-Albania. Për vitet e mëparshme duhet më shumë punë. Shikoni si të merrni vërtetimin e vjetërsisë.
Hapat praktikë
- Mblidhni të gjitha dokumentet e punës në Shqipëri që keni.
- Kontrolloni në e-Albania çfarë periudhash dalin.
- Kërkoni vërtetimet që mungojnë.
- Aplikoni në INPS, vetë ose me patronato, duke bashkëngjitur dokumentet shqiptare.